தமிழ் சினிமாவில் பாடல்கள் சிறிய பட்ஜெட் படங்களுக்கு பெரிய தொடக்கத்தை அளித்திருக்கின்றன. பாடல்களுக்குப் பிறகு, படத்தின் தலைப்பே ரசிகர்களை ஈர்க்கும் முக்கிய காரணியாக அமைகிறது. பெரிய நடிகர்கள் இல்லாத சிறிய படங்களுக்கு, தலைப்பே முக்கிய முகவரியாக செயல்பட்டிருக்கிறது. தமிழ் சினிமா பல வித்தியாசமான மற்றும் ஈர்க்கக்கூடிய தலைப்புகளைக் கொண்டு வந்திருக்கிறது. ஏற்கனவே பிரபலமாகிய பழைய திரைப்படத் தலைப்புகளை மீண்டும் பயன்படுத்துவது ஒரு பழைய யுக்தியாகும். இது 1950களில் இருந்தே தொடர்ந்து வரும் ஒரு மரபு.
இதற்கு சிறந்த உதாரணம், 1958ல் சிவாஜி கணேசன் நடித்த “உத்தம புத்திரன்”. இதே தலைப்பில் 1940ல் பி.யூ. சின்னப்பா நடித்த ஒரு படம் வெளியானது. இப்போது, சிவாஜி கணேசனின் “பராசக்தி” படத்தின் தலைப்பை, சிவகார்த்திகேயனின் 25வது படத்திற்கு பயன்படுத்தியுள்ளனர். இது சிவகார்த்திகேயன் முதல் முறையல்ல; இதற்கு முன் ஐந்து முறை பழைய படங்களின் தலைப்புகளைப் பயன்படுத்தியுள்ளார். அவை எவை என்பதை இப்போது பார்க்கலாம்.
1. எதிர்நீச்சல்
சிவகார்த்திகேயனை முதன்முதலாக கதாநாயகனாக ரசிகர்கள் ஏற்றுக்கொண்ட படம் “எதிர்நீச்சல்”. துரை செந்தில்குமார் இயக்கத்தில், தனுஷ் தயாரிப்பில் 2013ல் வெளியான இந்த படம், 1968ல் வெளியான அதே பெயரிலான படத்தின் தலைப்பைப் பயன்படுத்தியது. 1968ல் வெளியான “எதிர்நீச்சல்” படத்தை கே. பாலச்சந்தர் இயக்கியிருந்தார், மேலும் நாகேஷ் முதன்முறையாக நகைச்சுவை வேடங்களில் இருந்து விலகி, முழுநீள கதாநாயகனாக நடித்திருந்தார். சிவகார்த்திகேயனும் இந்த படத்தின் மூலம் முதன்முதலாக கதாநாயகனாக அறிமுகமானார்.
2. காக்கி சட்டை
“எதிர்நீச்சல்” வெற்றிக்குப் பிறகு, துரை செந்தில்குமார் மற்றும் சிவகார்த்திகேயன் இணைந்து 2015ல் வெளியான படம் “காக்கி சட்டை”. இந்த படத்தில் சிவகார்த்திகேயன் முதன்முறையாக ஆக்ஷன் ரோலில் நடித்தார். இதே பெயரில் 1985ல் கமல்ஹாசன் நடித்த ஒரு படம் வெளியானது. கமல்ஹாசனின் “காக்கி சட்டை” ஒரு பெரிய ஹிட் ஆகும். இரு படங்களும் போலீஸ் கதாபாத்திரங்களை மையமாகக் கொண்டிருந்தாலும், கதைக்களத்தில் எந்த ஒற்றுமையும் இல்லை.
3. வேலைக்காரன்
மோகன் ராஜா இயக்கத்தில் 2017ல் வெளியான “வேலைக்காரன்” படத்தில், சிவகார்த்திகேயன் ஒரு கார்ப்பரேட் நிறுவனத்தில் வேலைக்காரனாக சேர்ந்து, அங்கு நடக்கும் தவறுகளை சரிசெய்யும் கதையைச் சொன்னார். இதே தலைப்பில் 1987ல் ரஜினிகாந்த் நடித்த “வேலைக்காரன்” படம் வெளியானது. அந்த படத்தில் ரஜினிகாந்த் ஒரு பணக்கார குடும்பத்தில் வேலைக்காரனாக சேர்ந்து, தவறுகளை தடுத்து நிறுத்துவார். இந்த ஒற்றுமையால் சிவகார்த்திகேயன் இந்த தலைப்பைத் தேர்ந்தெடுத்திருக்கலாம்.
4. மாவீரன்
2023ல் மடோன் அஸ்வின் இயக்கத்தில் வெளியான “மாவீரன்” படம், சிவகார்த்திகேயனின் நடிப்பு வாழ்க்கையில் ஒரு முக்கியமான படமாக அமைந்தது. இந்த படம் பேண்டசி ஜானரில் அமைந்துள்ளது. இதே தலைப்பில் 1986ல் ரஜினிகாந்த் நடித்த “மாவீரன்” படம் வெளியானது. அந்த படம் சுதந்திரத்திற்கு முந்தைய காலகட்டத்தை மையமாகக் கொண்டிருந்தது.
5. அமரன்
1992ல் கார்த்திக் நடித்த “அமரன்” படத்தின் தலைப்பை, சிவகார்த்திகேயன் தனது 2022 தீபாவளி படத்திற்கு பயன்படுத்தினார். ராஜ்குமார் பெரியசாமி இயக்கத்தில் உருவான இந்த படம், ராணுவ வீரர் மேஜர் முகுந்த் வரதராஜனின் வாழ்க்கையை மையமாகக் கொண்டது. கார்த்திக்கின் “அமரன்” படம் கேங்ஸ்டர்களின் வாழ்க்கையைச் சொல்வதாக இருந்தது.
6. பராசக்தி
இப்போது, சிவகார்த்திகேயன் நடிக்கும் “பராசக்தி” படம், 1952ல் வெளியான அதே பெயரிலான படத்தின் தலைப்பைப் பயன்படுத்தியுள்ளது. 1952ல் வெளியான “பராசக்தி” படத்தில் சிவாஜி கணேசன் அறிமுகமானார். இந்த படம் வறுமை, மூடநம்பிக்கைகள் போன்ற சமூக பிரச்சினைகளை கடுமையாக விமர்சித்தது.
தற்போது சிவகார்த்திகேயன் நடிக்கும் “பராசக்தி” படத்தை சுதா கொங்கரா இயக்குகிறார். இந்த படம் 1960களின் காலகட்டத்தை மையமாகக் கொண்டு உருவாக்கப்பட்டுள்ளது. சிவகார்த்திகேயன் உடன் அதர்வா, ரவி மோகன், ஸ்ரீலீலா போன்ற நட்சத்திரங்கள் இந்த படத்தில் நடித்துள்ளனர்.
இவ்வாறு, சிவகார்த்திகேயன் தனது படங்களுக்கு பழைய படத் தலைப்புகளைப் பயன்படுத்தி, ரசிகர்களை ஈர்க்கும் ஒரு பழைய யுக்தியைத் தொடர்ந்து பின்பற்றி வருகிறார்.
